Fundu 75 gamlar kvikmyndir á safni á Nýja Sjálandi

Safn 75 gamalla bandarískra kvikmynda, þar af margar sem taldar voru glataðar að eilífu hefur fundist á Nýja Sjálandi.

Myndirnar sem hér um ræðir voru geymdar og gleymdar á Kvikmyndasafni Nýja Sjálands þar til kvikmyndasérfræðingur frá Los Angeles fann þær þar nýlega.

Gimsteinninn í þessu safni var þögul mynd í fullri lengd sem hinn þjóðsagnakenndi leikstjóri John Ford gerði árið 1927 og ber heitið Upstream. Talið var að þessi mynd væri með öllu glötuð.

Ford vann ítrekað til Óskarsverðlauna á sinni tíð fyrir myndir á borð við Þrúgur reiðnnar og Hljóðláti maðurinn. Á tímabilinu milli 1917 og 1928 gerði Ford um 60 þöglar kvikmyndir en aðeins 10 þeirra hafa varðveittst fram til dagsins í dag.

Meðal annarra mynda í safninu má nefna verk þar sem leikkonur á borð við Clöru Bow, Mabel Normans og Mary Fuller eru í aðalhlutverkum. Samkvæmt frétt um málið í Guardian eru flestar myndirnar í góðu ásigkomulagi. Þær verða fluttar til Bandaríkjanna á næstunni og komið fyrir á sérstöku safni þar.