Steingrímur: Margar og langar brekkur eftir

Steingrímur J. Sigfússon talaði í dag við fjármálaráðherra Hollands og við formann íslensku samninganefndarinnar um niðurstöður þjóðaratkvæðagreiðslunnar sem fram fór á laugardag. Hann segist vonast til þess að hægt verði að halda viðræðum áfram á allra næstu dögum. Þetta kom meðal annars fram í máli Steingríms þegar þingmenn ræddu niðurstöðu atkvæðagreiðslunnar.

Steingrímur sagði að Hollenski fjármálaráðherra hafi fyrr í dag rætt við kollega sinn Alistair Darling og að fullur vilji sé hjá gagnaðilum Íslendinga í málinu til þess að vinna áfram að lausn málsins.

Steingrímur sagði einnig afar mikilvægt að hægt verði að viðhalda því andrúmslofti samstarfs á meðal Íslendinga sem náð hafi að skapa í síðustu samningalotu. Viðfangsefnið sé áfram að leysa þetta mál þannig að það og önnur mál því tengd geti haft sinn framgang.

Þjóðin á það skilið að mati Steingríms, þegar erfiðir tímar ganga yfir, að menn beri gæfu til þess að starfa saman að lausn málanna. Að lokum minnti hann á að hér á landi séu enn erfiðar aðstæður og margar og langar brekkur eftir áður en landinu tekst að rétta úr kútnum.