Ríkisstjórnin hefur stórskaðað trúverðugleika landsins

Sigmundur Davíð Gunnlaugsson formaður Framsóknarflokksins gagnrýndi harðlega á þingi í dag það sem hann kallar útúrsnúninga og spuna ríkisstjórnarinnar í Icesave málinu. Hann segir að Íslendingar hafi í atkvæðagreiðslu sýnt eindreginn vilja sinn í málinu en samt sem áður leyfi menn sér að snúa út úr.

Sigmundur gefur lítið fyrir þær fullyrðingar að kostnaðurinn við dráttinn á Icesave málinu jafnist á við þann sparnað sem hlýst af betri samningi og sagði hann mjög undarlegt að halda því fram að það, að borga ekki 40 milljarða í erlendum gjaldeyri, feli í sér kostnað.

„En hvað sýna staðreyndir?," spurði Sigmundur og benti á að gengi krónunnar hafi styrkst frá því forsetinn neitaði að staðfesta Icesave-lögin.

„Í þessu máli ættum við að láta af því að slá ryki í augu fólks," sagði Sigmundur einnig. Í lokin ræddi hann um stöðu ríkisstjórnarinnar eftir kosninguna og benti á að í aðdraganda hennar hefðu framsóknarmenn ítrekað sagt að ef samstaða næðist á meðal Íslendinga í samningaviðræðunum ætti atkvæðagreiðslan ekki að verða til þess að fella ríkisstjórnina. Hins vegar hefði verið óásættanlegt að heyra ráðherra tala gegn þjóðaratkvæðagreiðslunni. Nú væri svo komið að ríkisstjórnin hafi stórskaðað trúverðugleika landsins.