Þingmenn VG vilja AGS út

Nokkrir þingmenn vinstri grænna íhuga að styðja þingsályktunartillögu Framsóknar og Hreyfingarinnar um að samstarfi við AGS verði slitið. A.m.k þrír þingmenn Vinstri grænna vilja endurskoða samstarfið. Fyrrverandi ráðherra vill slíta því.

Framsóknarflokkurinn og Hreyfingin lögðu sameiginlega fram þingsályktunartillögu í liðinni viku um að samstarfi við Alþjóðagjaldeyrissjóðinn yrði slitið. Rætt var um málið í eina klukkustund og enginn stjórnarþingmenn tóku þátt í því. Stuðningur við málið er þó til staðar innan þingflokks Vinstri grænna.

„Ég hef ekkert farið leynt með þá skoðun mína að það beri að endurskoða efnahagsáætlun AGS og ekki síst núna eftir þessa þjóðaratkvæðagreiðslu. Þjóðin hafnaði Icesave-samkomulaginu sem stjórn Alþjóðagjaldeyrissjóðsins hefur þrýst mjög á að við samþykkjum," segir Lilja Mósesdóttir, þingmaður Vinstri grænna og formaður viðskiptanefndar Alþingis.

Annar talsmaður þess að samstarfið við AGS verði endurskoðað er Ögmundur Jónasson. Ögmundur sem staddur er í Noregi sagðist í samtali við fréttastofu vera sammála markmiðum tillögu Framsóknar og Hreyfingarinnar og sagði orðrétt:

„Ég er sammála markmiðum tillögunnar og hef löngum lagt áherslu á að mikilvægt sé að við losnum við AGS úr landi. Ég mun vinna að því innan stjórnarmeirihlutans að ná þessum markmiðum fram."

Aðrir þingmenn sem hafa verið sagðir reiðubúnir að endurskoða samstarfið við AGS eru Atli Gíslason, Guðfríður Lilja Grétarsdóttir og Ásmundur Einar Daðason. Ásmundur Einar sagðist í samtali við fréttastofu hafa miklar efasemdir um samstarfið við AGS. Hann sagðist jákvæður gagnvart þingsályktunartillögu Framsóknar og Hreyfingarinnar. Ekki náðist í þau Guðfríði Lilju og Atla þrátt fyrir ítrekaðar tilraunir.