Vítin verða nú æfð sérstaklega hjá Tottenham-liðinu

Tom Huddlestone reyndist ekki vera betri vítaskytta en Jermain Defoe fyrir Tottenham -liðið því hann lét Jussi Jaaskelainen verja frá sér víti í jafnteflinu á móti Bolton í enska bikarnum í gær. Tottenham hefur aðeins skorað úr 2 af 6 vítum sínum í vetur.

Huddlestone hefði getað tryggt Tottenham sæti í átta liða úrslitunum hefði hann skorað úr vítinu en þess í stað þurfa liðin nú að mætast aftur.

Harry Redknapp, stjóri Tottenham, setti Jermain Defoe af sem vítaskyttu liðsins á dögunum eftir að Defoe hafði klikkað á 6 af síðustu 10 spyrnum sínum.

Eini maðurinn sem hefur skorað úr víti fyrir Tottenham á tímabilinu er Robbie Keane en hans nýtur nú ekki lengur við þar sem hann er í láni hjá skoska liðinu Celtic.

Joe Jordan, þjálfari aðalliðsins,lét hafa það eftir sér eftir leikinn á móti Bolton að hann ætlaði að fara æfa vítin sérstaklega á æfingum liðsins á næstunni.

Það eru ekki bara víti innan leikjanna sem gætu ráðið örlögum Tottenham í enska bikarnum því liðið gæti einnig lent í vítaspyrnukeppni og þar væru örugglega margir tilbúnir að veðja á móti þeim út frá vítanýtingu vetrarins.