Ferguson: Auðvitað viljum við halda Vidic hjá félaginu

Knattspyrnustjórinn Sir Alex Ferguson hjá Manchester United hefur þvertekið fyrir sögusagnir þess efnis að varnarmaðurinn Nemanja Vidic sé á förum frá félaginu næsta sumar.

Hinn 28 ára gamli Vidic hefur verið sterklega orðaður við Real Madrid og spænsk dagblöð hafa greint frá því að viðræður á milli félaganna séu þegar hafnar.

„Auðvitað viljum við halda Vidic hjá félaginu. Hann er frábær leikmaður og einn besti varnarmaður í heimi. Það er svo sem ekkert óeðlilegt að leikmenn okkar séu reglulega orðaðir við önnur félög en það þýðir ekkert að vera að velta sér upp úr því," segir Ferguson sem vonast til þess að Vidic geti byrjað að spila aftur fljótlega en hann hefur ekkert leikið með United á árinu 2010 vegna meiðsla.

„Hann er búinn að vera að æfa á fullu síðustu tíu daga en hann kveðst ekki vera tilbúinn að spila leik alveg strax en það styttist," segir Ferguson.