Endurskoða lög um erlendar fjárfestingar

Gylfi Magnússon, efnahags- og viðskiptaráðherra, segir að unnið sé að endurskoðun laga um takmarkanir á erlendri fjárfestingu. Hann segir líklegt að frumvarp til endurskoðaðra laga verði lagt fram á haustþingi. „Ég get samt engu lofað," segir Gylfi.

Núgildandi lög eru frá árinu 1991. Þar er lagt bann við eignarhaldi erlendra aðila í íslenskum sjávarútvegi. Enn fremur verða Íslendingar að eiga meirihluta í innlendum flugfélögum. Þá eru settar verulegar skorður við erlendu eignarhaldi í orkufyrirtækjum, en einungis Íslendingar og aðilar af EES-svæðinu mega eiga hlut í þeim.

Miklar deilur hafa sprottið um túlkun laganna, vegna fjárfestingar kanadíska fyrirtækisins Magma Energy, í HS-orku. Félagið fjárfestir hér á landi í gegnum sænskt dótturfélag sitt, en eina starfsemi þess fyrirtækis virðist vera að eiga hlut í HS-orku.

Nefnd sem fylgist með lögum um takmörkun erlendrar fjárfestingar klofnaði í afstöðu sinni til kaupanna á sínum tíma. Þrír nefndarmenn, Samfylkingar, Sjálfstæðis- og Framsóknarflokks, túlka lögin svo að þar sem sænskur aðili, með heimilisfesti af EES-svæðinu, kaupi hlutinn þá dugi það til. Minnihluti nefndarinnar taldi það hins vegar ekki í anda laganna að heimila kaupin.

Nefndin telur samt sem áður einhverja annmarka vera á lögunum því þegar í janúar á þessu ári í ljós þá skoðun að þau þyrfti að endurskoða. Brýnt væri að öll tvímæli yrðu tekin af í þessum málum og Alþingi hefði um það lokaorð.