Íslendingum boðið vaxtalækkun á Icesave

Bretar og Hollendingar munu bjóða Íslendingum verulega vaxtalækkun á Icesave skuldbindingunum samkvæmt heimildum fréttastofu, en gagntilboð berst íslenskum stjórnvöldum væntanlega á morgun. Formaður Sjálfstæðisflokksins segir vaxtahugmyndir þeirra hafa verið fáránlegar hingað til.

Forystufólk stjórnar og stjórnarandstöðu fundaði með samninganefnd Íslands í Icesavedeilunni í fjármálaráðuneytinu í morgun. En samninganefndin kynnti hugmyndir Íslendinga að lausn málsins á fundum í Lundúnum í vikunni. Búist er við formlegum viðbrögðum Breta og Hollendinga bráðlega.

Samkvæmt heimildum fréttastofunnar ætla Bretar og Hollendingar að bjóðast til að lækka vextina á Icesave skuldbindingunum úr 5,55 prósentum nær tveimur prósentum. En Reuters fréttastofan hefur það eftir heimildum í breska fjármálaráðuneytinu að boðnir verði breytilegir vextir. Þá er það haft eftir heimildum í Hollandi að tilboð þjóðanna gæti orðið til þess að þjóðaratkvæðagreiðsla um Icesave þyrfti ekki að fara fram hinn 6. mars.

En vaxtalækkun ein dugar varla Íslendingum, því stjórnarandstaðan hefur ekki sætt sig við ríkisábyrgðina og að um einkaréttarsaming verði að ræða en ekki þjóðréttarlegan.

Formaður Sjálfstæðisflokksins segir alla sammála um að gott væri að fá niðurstöðu í málið sem allra fyrst.