Ögmundur og Jón Steinar sammála

Dómsmálaráðherra er sammála Jóni Steinari Gunnlaugssyni hæstaréttardómara og Róbert Spanó, deildarforseta lagadeildar Háskóla Íslands, um að setja skuli á fót millidómstól og draga þannig úr álagi á Hæstarétt. Hann bendir á að þau viðhorf sem Jón Steinar hafi reifað virðist vera samdóma álit úr stétt lögmanna og dómara. Það hafi hann fengið staðfest á málþingi sem hann sótti á dögunum.

„Spurningin er þá hvernig við komum þessu í framkvæmd og með hvaða hraði við gerum það. Ég held að þetta sé ekki spurning um hvort heldur hvenær. Ég hef þegar tekið málið upp í dómsmálaráðuneytinu og lýst því yfir að það verði tekið í útrétta hönd lögmannasamfélagsins um samstarf í þessu efni," segir Ögmundur Jónasson dómsmálaráðherra. Málið sé því að komast í þann farveg sem Jón Steinar Gunnlaugsson og aðrir hafi kallað eftir.

Þeir Jón Steinar og Róbert Spanó telja mögulegt að millidómstóll geti tekið til starfa á miðju næsta ári. Ögmundur segist ekki treysta sér til að leggja mat á það. „Hitt er ljóst að það er ekkert sem á að koma í veg fyrir að við setjum málið i farveg," segir Ögmundur.