Þjófarnir breyttu bátnum

Báturinn sem var stolið af landi í Mjóaanesi við Þingvallavatn fyrr í mánuðinum er kominn í leitirnar. Lögreglan í Hafnarfirði fann bátinn í iðnaðarhúsi í Hafnarfirði nú á dögunum en þar fannst einnig eitthvað af þýfi og tæki til landaframleiðslu.

Þegar lögregla gerði húsleit var búið að breyta bátnum, fjarlægja rúðu úr honum og mála á hann rendur, líklega í þeim tilgangi að breyta honum svo ekki væri hægt að bera kennsl á hann, að sögn lögreglunnar.

Eigendurnir komu og sóttu bátinn í gær. Kona á þrítugsaldri, sem er skráður eigandi hússins, verður yfirheyrð vegna málsins í dag.

Bátnum var stolið á tímabilinu 6. til 9. júlí en hann er af gerðinni Broom og er hvítur með 40 hestafla Suzuki utanborðsmótor. Þjófarnir klipptu í sundur hengilás á keðju að heimreið bústaðarins, til að komast að bátnum.

Þá fannst eitthvað af veiðifatnaði og vörum í húsnæðinu sem var stolið úr bíl í Reykjavík fyrir skemmstu.