Henry skoraði á móti Tottenham í fyrsta leiknum með New York Red Bulls

Thierry Henry var á skotskónum í fyrsta leiknum sínum með New York Red Bulls í æfingaleik í Bandaríkjunum í nótt. Tottenham-liðið svaraði hinsvegar með tveimur mörkum og vann leikinn 2-1.

Thierry Henry kom New York Red Bulls í 1-0 eftir 25 mínútna leik en fór síðan útaf í hálfleik. Tottenham tók yfir leikinn í seinni hálfleiknum, Robbie Keane jafnaði á 62. mínútu og Gareth Bale skoraði síðan sigurmarkið tíu mínútum síðar.

„Mörkin eiga eftir að koma hjá mér. Ég fékk frábærar móttökur og áhorfendurnir fögnuðu í hvert skipti sem ég fékk boltann. Það var mikilvægt fyrir mig að líða eins og ég væri heima hjá mér," sagði Thierry Henry eftir leikinn.

Harry Redknapp var í léttu skapi eftir leikinn. „Þessi ungi strákur hjá þeim, Henry, lítur út fyrir að geta átt bjarta framtíð," grínaðist Harry Redknapp. „Hann var frábær og var í öðrum klassa. Hann er enn heimsklassa leikmaður. Við vorum heppnir að vinna þennan leik en við stóðum okkur ágætlega miðað við að vera nýbyrjaðir að æfa," sagði Redknapp.