Vilja ættleiða börn frá Haítí til Íslands

Ætli alþjóðasamfélagið að bregðast við hörmungum á Haítí með því að ættleiða munaðarlaus börn úr landi bíða yfir 130 fjölskyldur og einstæðar konur þess hér á landi að geta ættleitt börn, segir Hörður Svavarsson, formaður Íslenskar ættleiðingar.

Félagið hefur sent Rögnu Árnadóttur, dóms- og manréttindamálamálaráðherra, bréf þar sem vakin er athygli á þessari stöðu. Þar segir að hugsanlegt sé að eitthvað af því fólki sem bíði þess að ættleiða börn sé tilbúið til að fá börn frá Haítí inn í sínar fjölskyldur.

Hörður segist þrátt fyrir þetta ekki gera sér miklar vonir til þess að munaðarlaus börn frá Haítí komi hingað til lands. Ekki sé formlegt ættleiðingarsamband á milli landanna, og reynslan sýni að mikið sé að gera hjá þeim starfsmönnum dómsmálaráðuneytisins sem fari með þennan málaflokk.

„En stundum er stjórnsýslan öflug, við sáum hvernig hægt var að bregðast við þegar rústabjörgunarsveitin fór út,“ segir Hörður.

Talið er að um 50 þúsund munaðarlaus börn hafi verið á Haítí áður en jarðskjálftinn lagði höfuðborg landsins og nærsveitir að segja má í rúst.

UNICEF og önnur alþjóðleg samtök hafa varað þjóðir heims við hættu á því að nokkurs konar gullgrafaraæði brjótist út hjá fólki sem vilji ættleiða börn í kjölfar hörmunganna á Haítí. Þá er varað við hættu á mansali með börn frá landinu.

Hörður segir stjórn Íslenskrar ættleiðingar vel meðvitaða um þá hættu, og tekur undir varnaðarorðin. Treysta verði stjórnvöldum hér og annars staðar til að tryggja hagsmuni barna við ættleiðingar.

Ragna Árnadóttir dómsmálaráðherra staðfesti í gær að erindi Íslenskrar ættleiðingar hefði borist. Ekki hafi verið tekin afstaða til þess hvernig því verði svarað.

brjann@frettabladid.is