Hvergerðingar svipist um eftir Jónasi

Björgunarsveitir fyrir austan fjall og af höfuðborgarsvæðinu voru kallaðar út rétt eftir miðnætti í gærkvöld til leitar að karlmanni á sextugsaldri sem saknað er frá dvalarheimilinu Ási í Hveragerði.

Síðast spurðist til hans um klukkan sex í gær. Um 100 björgunarsveitamenn taka nú þátt í leitinni og hafa í nótt leitað innanbæjar í Hveragerði og á svæðinu í kringum bæinn.

Karlmaðurinn Jónas S Þorleifsson er 53 ára, 180 sentímetrar á hæð, grannvaxinn með dökkt þunnt hár og líklega í ljósri yfirhöfn.

Lögreglan á Selfossi biður þá, sem gætu hafa orðið hans varir, að láta sig vita. Þá biður lögreglan íbúa í Hveragerði að grennslast eftir honum í og við híbýli sín.