Nýliði í þriðja sæti VG - Líf er í skýjunum og með báðar fætur á jörðinni

„Ég er alveg í skýjunum. Himinlifandi, en auðvitað spyr maður að leikslokum," segir Líf Magneudóttir sem er í þriðja sæti í forvali VG í Reykjavík en þess ber að geta að aðeins þrjúhundruð atkvæði af þúsund hafa verið talin. Því getur staðan hæglega breyst.

„Eins og staðan er nú, þegar ég tala við þig, þá er ég himinlifandi og þakklát fyrir traustið sem félagsmenn hafa sýnt mér. Og ég mun ekki bregðast þessu trausti," segir Líf en þetta er hennar fyrsta forval hjá Vinstri grænum því er óhætt að kalla hana nýliða í því samhengi. Hún segir líka árangurinn stuðningsmönnum að þakka og þaulvönu fólki sem hafi aðstoðað hana í forvalinu.

Líf segist þó hafa vaðið fyrir neðan sig, kvöldið er ungt.

„Maður gæti orðið óheppin og dæmin hafa sannað það," segir Líf með báðar fætur á jörðinni.