Læknar samþykkja að fresta hækkun

Félagsmenn í Læknafélagi Reykjavíkur hafa samþykkt að fresta umsaminni hækkun á einingaverði í gjaldskrám sjálfstætt starfandi lækna. Hækkunin átti að taka gildi 1. apríl, en var frestað til 1. júní næstkomandi.

„Við viljum reyna að nota tímann þangað til í júní til að ræða við heilbrigðisráðherra um framhaldið á þessari þjónustu,“ segir Sigurður Böðvarsson, formaður Læknafélags Reykjavíkur.

Álfheiður Ingadóttir heilbrigðisráðherra hafði lagt að sjálfstætt starfandi sérfræðilæknum að fresta 1,9 prósenta hækkun á einingaverðinu, og samþykktu félagsmenn í Læknafélagi Reykjavíkur það á fundi á mánudag. Sigurður segir boðaðan niðurskurð ráðuneytisins þýða á bilinu 30 til 40 prósenta niðurskurð hjá sjálfstætt starfandi læknum. Gangi það eftir muni þessi rekstur líða undir lok.

Það er mikið áhyggjuefni fyrir sjúklinga sem treysta á þá þjónustu sem læknarnir veita, segir Sigurður. Um 400 þúsund heimsóknir eru skráðar hjá sjálfstætt starfandi sérfræðilæknum á ári, um 100 þúsund fleiri en hjá heilsugæslustöðvum.

Læknar eru tilbúnir til að taka á sig sinn skerf af þeim niðurskurði sem fara þarf í, segir Sigurður. Um ár er síðan sérfræðilæknar gáfu eftir um tíu prósenta hækkun á einingarverði. - bj