Tilfellin erfið þegar aflima þarf í rústum

Fulltrúar íslenskra stjórnvalda og fyrirtækja ferðast nú um Sichuan-fylki í suðvestur Kína til að fylgja eftir samstarfi Íslendinga og Kínverja við uppbyggingu á jarðskjálftasvæðum. Jarðskjálfti sem nam átta á Richter reið yfir í Kína í maíbyrjun 2008 með þeim afleiðingum að tugþúsundir létust og milljónir misstu heimili sín.

Sendinefndin heimsótti í gær endurhæfingarmiðstöð í Chengdu, höfuðborg fylkisins, en þar hefur stoðtækjafyrirtækið Össur starfað með góðgerðasamtökunum Stand Tall frá Hong Kong.

Að sögn Árna Alvars Arasonar, framkvæmdastjóra Össurar í Asíu, hafa þegar um 300 manns fengið þar meðferð. Um er að ræða fólk sem slasaðist mikið, eða missti útlimi. Árni er jafnframt formaður Íslenska viðskiptaráðsins í Kína.

Árni Almar segir Össur hafa allmikla reynslu af hjálparstarfi á jarðskjálftasvæðum, en þar sé oft unnið við afar erfiðar aðstæður.

„Oft eru þetta einstaklingar sem missa útlimi við erfiðar aðstæður. Þannig getur verið um að ræða fólk sem þarf að aflima í sjálfum rústunum til að bjarga því. Í slíkum tilvikum er endurhæfingin erfið og getur tekið langan tíma."

Að sögn Árna Alvars er fjármagn sjaldnast erfiðasti hjallinn við hjálparstarf eftir hamfarir líkar þeim sem yfir gengu í Kína, heldur framkvæmdin og að finna rétta samstarfsaðilann.

„Í byrjun eru margir boðnir og búnir, en vandinn eykst þegar kemur að eftir­fylgninni," segir hann, en Össur komst í samband við lækna í Hong Kong sem ákváðu að fara af stað með hjálparstarf undir heitinu Stand Tall.

„Og þeir ætla sér raunar stærri hluti í að færa þekkingu til Chengdu og byggja endurhæfingarspítala. Áskorunin er að tryggja eftirfylgni og aðgang að vörum til lengri tíma."

Árni Alvar segir að starfsfólk Össurar hafi verið í Chengdu og unnið með fólki á staðnum, meðal annars við þjálfun í um fimm mánaða skeið á meðan verkefninu var komið á legg. Hann segir þetta þó ekki góðgerðastarf af hálfu Össurar nema í bland, því fyrirtækið selji framleiðsluvörur sínar.

„En það er hins vegar töluverð ákvörðun að fara af stað í svona aðstæðum því leggja þarf meira í þjálfun en venjulega er gert."

Þá segir hann Össur í raun starfa utan þess markaðssvæðis sem áhersla er lögð á í svona verkefni, en auk samstarfsins við Stand Tall þá hefur Össur einnig hafið samstarf við Rauða krossinn í Hong Kong.

olikr@frettabladid.is