Efast um lögmæti niðurskurðar

Þorbjörg Helga Vigfúsdóttir, borgarfulltrúi, efast um lögmæti niðurskurðar ríkisstjórnarinnar sem ákvað nýverið að loka fyrir nám grunnskólanemenda í framhaldsskólaáföngum. Auk þess sé verið að velta kostnaði yfir á sveitarfélög.

Þorbjörg rifjar upp í pistli á heimasíðu sinni að fyrir tveimur árum hafi lögum verið breytt svo grunnskólanemendur gætu meðal annars sótt áfanga í framhaldsskóla. Þörfum námshesta hafi þannig verið mætt og um leið sparaðist opinbert fé þar sem þessir nemendur væru líklegir til að taka framhaldsskólann á þremur árum í stað fjögurra.

Í lok síðasta árs tilkynnti ríkisstjórnin að hún myndi hætta þessum fjárveitingum. Ætlunin er að spara 70 milljónir. Þorbjörg segir að ákvörðunin hafi komið flatt upp á fræðsluskrifstofur landsins enda séu lög um grunnskóla afar skýr.

Ráðuneytið vísi fram og til baka í greinargerðir

Fulltrúar skólamála í sveitarfélögum landsins fengu fyrir helgi svör menntamálaráðuneytisins við fyrirspurnum um málið. Þorbjörg segir að ráðuneytið vísi fram og til baka í greinargerðir í svari sínu. Það segi meðal annars að fyrirfram megi ætla að þau sjónarmið að skerða möguleika á vali í námi á grundvelli samdráttar í ríkisútgjöldum og takmörkuðum möguleikum til innritunar nemenda í framhaldsskóla séu málefnaleg.

Þorbjörg er ósátt með svar menntamálaráðuneytisins. „Það væri fróðlegt að heyra mat lögfróðra manna á þessum fullyrðingum. Er hægt, á grundvelli samdráttar, að brjóta á rétti nemenda eins og menntamálaráðuneytið gerir? Ef svo er, geta þá t.d. sveitarfélög með sömu réttlætingu, þ.e.a.s. með rökum um samdrátt í rekstri sveitarfélaga, brotið á rétti nemenda til skyldunáms?"

Kostnaður færður frá ríki til sveitarfélaga

Þorbjörg segir að hægt sé að færa rök fyrir því að sparnaðurinn sem ríkisstjórnin ætlar að ná fram þýði aukinn kostnað til lengri tíma þar sem þessir nemendur spari ríkinu fjármuni með því að fara hraðar í gegnum framhaldsskólakerfið. Auk þess sé líklegt að kostnaðurinn falli á sveitarfélögin sem muni mörg hver bjóða grunnskólanemum sínum upp á framhaldsskólaáfanga.

„Þessi niðurskurður, sé hann löglegur, er þannig einungis tilfærsla útgjalda. Verið er að færa kostnað frá ríki til sveitarfélaga án þess að gefa því gaum að það eru sömu launþegarnir sem greiða skattinn hjá báðum," segir Þorbjörg í pistlinum sem hægt er að lesa hér.