Lögreglan varar við netfangaþjófum

Ríkislögreglustjóri vill aðvara almenning en vart hefur orðið við það að netföngum fólks hjá þjónustuaðilum á borð við Hotmail, G-mail o.fl. er stolið og síðan er sendur út fjöldapóstur á öll netföng í netfangaskrá viðkomandi.

„Netföngum er stolið með þeim hætti að þolandinn fær tölvupóst sem virðist vera frá þjónustuaðilanum þar sem spurt er hvort hann ætli að nota netfangið sitt áfram. Ef svo, er hann beðinn um að staðfesta það með því að senda aðgangsorð og lykilorð til baka. Með þessar upplýsingar undir höndum getur sendandinn skráð sig inn á póstþjónustuna eins og um eigandann væri að ræða og breyti hann um lykilorð, er hann búinn að yfirtaka netfang viðkomandi með öllu sem því tilheyrir, innkominn og útsendan póst og tengiliðaskrá," segir í tilkynningu frá Ríkislögreglustjóra.

„Síðan er sendur svikapóstur í nafni réttmæts eiganda pósthólfsins til allra þeirra sem eru í tengiliðaskránni og gengur út á að sendandinn sé staddur erlendis, hafi týnt veski sínu með peningum, skilríkjum og greiðslukortum. Hann biður því um að láta senda sér reiðufé gegnum miðlara eins og Western Union. Svikarinn bíður svo eftir reiðufjársendingu."

Ríkislögreglustjóri vill því árétta enn og aftur að fólk varðveiti öll lykilorð sín tryggilega og sendi þau aldrei í tölvupósti til einhverra aðila sem óska eftir þeim.