Atkvæðagreiðslu um að banna nautaat frestað

Yfirvöld í Katalóníuhéraði á Spáni hafa frestað atkvæðagreiðslu um hvort banna skuli nautaat í héraðinu. Það eru samtök dýravina sem vilja fá atið bannað.

Stuðningsmenn nautaats segja að það sé aldagömul hefð og hluti af menningararfleifð þjóðarinnar. Andstæðingarnir segja að það sé aðeins ill meðferð á dýrum.

Atkvæðagreiðslunni var frestað meðan verið er að kanna hvort hún brjóti hugsanlega í bága við stjórnarskrá Spánar.

Nautaat er leyft í öllum héruðum Spánar nema á Kanaríeyjum. Þar var það bannað árið 1991.