Tvö atriði standa eftir

Steingrímur J. Sigfússon, fjármálaráðherra, segir mikilvægt að stjórnvöld ljúki ákveðinni vinnu svo endurskoðun á efnahagsáætlun þeirra og Alþjóðagjaldeyrissjóðsins geti farið fram. Tvö atriði standi eftir.

„Það sem er að gerast akkúrat núna er að við erum að klára endanlega það sem af Íslands hálfu þarf að liggja fyrir þannig að fyrirtekt geti farið fram. Tvö atriði standa eftir sem við vonumst til að klára í þessari viku," segir Steingrímur.

Verið sé að ganga endanlega frá áætlun um skuldastýringu og stefnumótun í þeim efnum. Steingrímur segir að unnið sé að því með aðstoð erlendra ráðgjafa. Einnig eigi eftir að ákveða endanlegt orðalag varðandi endurskipulagningu fjármálakerfisins.

Steingrímur segir að ekkert liggi fyrir með lán frá hinum Norðurlöndnum. „Það er mikilvægt að við klárum allt sem að okkur stendur. Þá verður ekki hægt að bera neinum tæknilegum smáatriðum við þar sem Ísland verður búið að uppfylla allt sitt."