ASÍ: Alþingi verður að ljúka Icesave deilunni

Miðstjórn Alþýðusambands Íslands lýsir yfir þungum áhyggjum af stöðu efnahags- og atvinnumála. Hún segir brýnt að ljúka Icesave deilunni sem fyrst. Auk þess verði stjórnvöld að gera átak í mannaflsfrekum framkvæmdum.

Í ályktun miðstjórnar ASÍ segir að ríkisstjórn og Alþingi verði að gera sér grein fyrir því að kaupmáttur ráðstöfunartekna almennings hefur lækkað verulega síðustu misseri. Atvinnuleysi mælist nú hærra en nokkru sinni fyrr, eða 9,3% sem jafngildi því að rúmlega 15 þúsund manns séu án atvinnu. „Þessi staða er með öllu ólíðandi og aðgerðaleysi óásættanlegt með öllu.“

Miðstjórn ASÍ telur að nú skipti höfuðmáli að koma hjólum efnahags- og atvinnulífsins í gang aftur og auka verðmætasköpun í landinu þannig að hægt verði að ráða fólk í vinnu og hækka laun. Einungis þannig geti þjóðin unnið sig út úr þeim mikla efnahagsvanda sem hún glími nú við. Til þess þurfi allir að leggja sitt af mörkum.

Allir axli sinn hluta af ábyrgðinni

„Miðstjórn ASÍ krefst þess að allir axli sinn hluta af ábyrgðinni og vinni að þessu sameiginlega markmiði. Stjórnvöld, bæði ríkisstjórn og sveitarstjórnir, bera sérstaka ábyrgð á að gera allt sem í þeirra valdi stendur til þess að eyða óvissu og stuðla að frekari uppbyggingu og fjárfestingum,“ segir í ályktuninni.

Miðstjórn segir brýnt að Alþingi ljúki hinni erfiðu Icesave deilu sem allra fyrst til að auðvelda aðgengi að erlendu fjármagni til uppbyggingar og stuðla að hraðari vaxtalækkun. Hraða verði vinnu vegna undirbúnings stórframkvæmda, sérstaklega í skipulagsmálum.

„Þá verða stjórnvöld að gera átak í mannaflsfrekum framkvæmdum, hvort heldur sem er í eigin nafni eða einkaframkvæmdir, og þiggja tilboð lífeyrissjóðanna um fjármögnun slíkra verkefna.“