Flóahreppur stefnir Svandísi vegna Urriðafossvirkjunar

Sveitarstjórn Flóahrepps hefur samþykkt að höfða mál gegn Svandísi Svavarsdóttur umhverfisráðherra til að ógilda ákvörðun hennar um að hafna skipulagi Urriðafossvirkjunar. Sveitarstjórinn segir ráðherrann hafa vanvirt skipulagsvald sveitarfélaga.

Ákvörðun Svandísar í lok janúar, að hafna aðalskipulagi vegna þriggja virkjana í neðri Þjórsá, hafði þau áhrif að Landsvirkjun ákvað að fresta öllum viðræðum við fjölda erlenda fyrirtækja sem óskað höfðu eftir orkukaupum og mat forstjóri Landsvirkjunar það að ákvörðun ráðherrans myndi tefja atvinnuuppbyggingu, sem nýtt hefði orku þessara virkjana, um eitt til tvö ár.

Sveitarstjórn Flóahrepps ætlar hins vegar ekki að sætta sig við að ákvörðun ráðherrans standi og samþykkti í fyrradag að höfða mál fyrir héraðsdómi til að fá henni hnekkt. Margrét Sigurðardóttir, sveitarstjóri Flóahrepps, segir sveitarstjórn Flóahrepps telja að ráðherrann hafi brotið á rétti sveitarfélagsins og vanvirt skipulagsvald sveitarfélaga með ákvörðun sinni.

Margrét segir þetta hafa verið fyrst og fremst pólitíska ákvörðun, ekki faglega, - Svandís sé á móti virkjununum. Hún hefði þessvegna, fremur en að fara í gegnum skipulagsvald sveitarfélaga, átt að beita sér með öðru móti, sem hún hafi alla burði til, sitjandi í ríkisstjórn.