Upphlaup útaf erfðabreyttum laxi

Laxinn sem fyrirtækið Aqua Bounty Technologies hefur erfðabreytt vex tvöfalt hraðar en villtur lax.

Rétt er að taka fram að meðfylgjandi myndir sýna hefðbundið laxeldi í Noregi.

Vísindamenn bandarísku Matvælastofnunarinnar segja að það sé jafn öruggt að borða laxinn og venjulegan villtan lax úr Atlantshafi.

Líffræðilega sé enginn munur sem skipti máli á vítamínum, steinefnum eða fitusýrum.

Þá er sagt að mjög litlar líkur séu á að fiskurinn geti haft skaðleg áhrif á umhverfið.

Þessu eru ýmis neytenda, dýraverndar- og umhverfissamtök ósammála. Þrjátíu og ein slík hafa tekið höndum saman um að berjast gegn því að laxinn fari á markað.

Þau segja að Matvælastofnunin byggi niðurstöður sínar á alltof litlu úrtaki.

Samskonar tilraunir á silingi í Kanada hafi leitt í ljós að fiskarnir stækkuðu að vísu hraðar, en að sumir þeirra hafi verið mjög vanskapaðir.

Það gæti því ógnað villistofnum ef erfðabreyttu laxarnir slyppu úr kvíum sínum.

Á Íslandi er engin löggjöf um erfðabreytt matvæli. Reglur um að þau verði sérstaklega merkt eru í þó vinnslu.

Þá er fyrirhugað að taka upp regluverk ESB í þessum málum. Með þeim þarf leyfi fyrir markaðssetningu á öllum erfðabreyttum matvælum, áhættumat og fleira.