Betra fyrir ketti að búa í Kópavogi

„Maður gleðst alltaf þegar maður kemur góðu máli í höfn," segir Guðríður Arnardóttir oddviti Samfylkingarinnar í Kópvogi og formaður bæjaráðs Kópavogs.

Reglur um kattahald í Kópavogi voru samþykktar á bæjarstjórnarfundi í gær en í reglunum segir meðal annars að eigendum katta sé skylt að láta örmerkja þá, ormahreinsa reglulega og vera með bjöllu á varptíma fugla. Þá kveður einnig á um að kattaeigendur hugi að því að kettir valdi ekki nágrönnum sínum ónæði eða tjóni.

„Reglunum verður vísað til fullnaðarafgreiðslu bæjarráðs og bæjarráð mun fínpússa þetta og laga einhverjar smávægilegar orðalagsbreytingar. En það liggur fyrir að það verða settar reglur um kattahald," segir Guðríður en lögin munu ekki taka gildi alveg strax þar sem það á eftir að auglýsa þetta í stjórnartíðindum.

Hún segir að það hafi verið einhugur innan bæjarstjórnar um að samþykkja reglurnar. „En auðvitað höfðu menn mismunandi skoðanir á einstaka greinum í þessum reglum. En það tjáði sig enginn um að hann væri á móti því að það yrðu settar reglur." Guðríður segir að það hafi verið rætt mikið og lengi um kattahald í bæjarstjórninni síðustu mánuði og þetta sé niðurstaðan.

Í reglunum segir einnig að heilbrigðisyfirvöld geti nú handsamað ketti sem ekki séu merktir og hefur verið kvartað yfir. Þá verða dýrin geymd í viku og ef eigendurnir hafa ekki sótt þá verða þeir aflífaðir. „Við göngum samt ekki svo langt að banna lausagöngu. Þetta eru ekki íþyngjandi reglur fyrir kattaeigendur. Ég myndi segja að þetta séu reglur sem kettir í Kópavogi ættu að fagna mjög því það tryggir að það verður betur hugsað um þá."