Rítalín selt í Draumnum

Söluturninn Draumurinn á Rauðarárstíg selur lyfseðilsskylda lyfið Rítalín. Fréttastofa Stöðvar 2 sannreyndi þessa fullyrðingu aðstoðarlandslæknis í gær.

Læknar sem til þekkja segja að ólögleg sala á lyfseðilskyldum lyfjum hafi aukist að undanförnu. Helst er um að ræða lyf á borð við concerta og rítalín sem einkum eru notuð af börnum. Áhyggjuefni sé að sumir forledrar sjái sér gróðavon í því að selja lyfin frá börnum sínum til fíkla og segist Matthías Halldórsson aðstoðarlandlæknir þekkja dæmi um slíkt. Hann viti meira segja til að hægt sé að nálgast þau í söluturni í Reykjavík.

Fréttastofa vildi sannreyna málið og fékk manneskju með upptökutæki til að fara í söluturninn Drauminn á Rauðarárstíg og biðja um lyfið Rítalín. Þar fékk hún þau svör að lyfið væri ekki til í augnablikinu en kostaði venjulega þúsund krónur. Matthías segist hafa tilkynnt lögreglunni um málið en hún hafi lítið sem ekkert aðhafst.