Vilja vita hvar til stendur að virkja

„Skorað er á ríkisstjórnina, einkum forsætisráðherra, umhverfisráðherra og iðnaðarráðherra, að taka saman yfirlit og gera rækilega grein fyrir því hvaða háhitasvæði og vatnsföll verður nauðsynlegt að virkja til þess að afla orku fyrir 360 þúsund tonna álverksmiðju í Helguvík.“ Svo hljóðar áskorun sem birt var á vef Náttúruverndarsamtaka Íslands.

Að áskoruninni standa einnig Náttúruverndarsamtök Suðurlands, Sól í Straumi, Sól á Suðurlandi, Sól á Suðurnesjum og Græna netið.

„Orkuþörf þessa fyrirhugaða álvers er um 650 MW eða sem nemur nærri einni Kárahnjúkavirkjun. Orkuvinnsla í slíku umfangi getur ekki komið til án þess að henni fylgi ráðstöfun fjölmargra dýrmætra hverasvæða og vatnsfalla sem mörg hver ættu heldur að njóta verndar,“ segir jafnframt í áskoruninni. - óká