Fær erlenda fyrirlesara heim

Búist er við að rúmlega þúsund manns, þar af um hundrað erlendir gestir og fyrirlesarar, sæki alþjóðlega risaráðstefnu Microsoft á Íslandi um upplýsingatækni, sem haldin verður í Reykjavík á morgun og miðvikudag. Á ráðstefnunni er að finna rjómann af þremur ráðstefnum sem haldnar voru í Bandaríkjunum og í Evrópu í fyrra.

Halldór Jörgensson, framkvæmdastjóri Microsoft á Íslandi, segir ráðstefnuhaldið viðbrögð við gengishruni krónunnar. „Íslendingar hafa í gegnum tíðina verið duglegir að sækja tækniráðstefnur erlendis og hafa þrír til tólf frá okkur farið með um þrjú hundruð manna hópi og haldið Íslendingakvöld fyrir hann.“

Þegar krónan féll hafi aðeins þrjátíu skráð sig til fararinnar. Í kjölfarið lagði Halldór höfuðið í bleyti og komst að því að miðað við aðstæður væri hagkvæmt að halda sambærilega ráðstefnu hér.

„Ég reiknaði út að við kæmum út á sléttu. Við getum meira að segja boðið ókeypis inn á hana í stað þess að fara,“ segir Halldór en þetta er í annað skiptið á jafnmörgum árum sem blásið er til ráðstefnu af þessum toga þar sem nýjasta tækni Microsoft er kynnt. Á sambærilega ráðstefnu hér í fyrra mættu 850 manns og var þetta þá stærsta ráðstefna í upplýsingatækni sem haldin hefur verið hér á landi. - jab