Ólafur F.: Ég náði að stöðva spillinguna

„Þetta er mikill sigur fyrir mín sjónarmið í deilunni um lóð fyrir Ungmennafélag Íslands við Tryggvagötu, segir Ólafur F. Magnússon, borgarfulltrúi.

Á fundi borgarráðs í dag var lagt fram bréf framkvæmdastjóra UMFÍ þar sem óskað er eftir því að félaginu verði úthlutað lóð við Tryggvagötu. Ólafur segir að þeirri beiðni hafi verið hafnað. Þess í stað hafi sviðsstjóra framkvæmda- og eignasviðs verið falið að ræða við fulltrúa UMFÍ um forsendur upphaflegs lóðafyrirheits samhliða því að skoða möguleika á annarri staðsetningu fyrir umrædda starfsemi.

„Þökk sé ábendingum mínum um Framsóknarvæðingu og spillingu tókst að koma í veg lóðaúthlutunina," segir Ólafur. „Ég náði að stöðva spillinguna."

Á fundinum í dag lagði Ólafur fram eftirfarandi bókun: „Ég fagna því að loks hafi verið brugðist við ábendingum mínum varðandi þetta mjög svo sérkennilega mál þar sem félag sem kennir sig við ungmennahreyfingu er misnotað í þágu persónulegra og pólitískra hagsmuna. Aldrei kom til greina að mínu mati að úthluta lóðinni Tryggvagötu 13 til UMFÍ."