Jarðhiti annar allri orkuþörf landsins

Framleiðsla á rafmagni með jarðhita hefur aukist mikið undanfarin ár og nú er svo komið að fræðilega væri hægt að anna allri almennri orkuþörf landsins með rafmagni þannig framleiddu. Þetta kom fram í erindi Sigurðar Inga Friðleifssonar, framkvæmdastjóra Orkuseturs, á aðalfundi Samorku á föstudag.

Alls eru framleiddar um 17 þúsund gígavattsstundir af orku hér á landi. Af þeim eru 4 þúsund framleiddar með jarðhita sem annar allri almennri orkunotkun á landinu.

Sigurður Ingi sagði að ef kynda þyrfti hús hér á landi með olíu, líkt og víða tíðkast, þyrfti að flytja inn 800 þúsund tonn árlega, með um 50 milljarða kostnaði. Þá sparast um 2,5 milljónir tonna af útblæstri gróðurhúsalofttegunda,við að hita húsin líkt og gert er hér. Til samanburðar má nefna að losun frá öllum vegasamgöngum er um 900 þúsund tonn.

Ísland stendur öðrum löndum framar í þessum efnum. Sigurður Ingi tók sem dæmi að í Hollandi eru aðeins framleidd tæplega 9 þúsund gígavattsstundir af grænni orku. Til þessarar sérstöðu landsins gleymist oft að líta þegar kemur að viðræðum við Evrópusambandið. Því sé mikill akkur og tölfræðilegur fengur að fá land sem framleiðir jafn mikið af grænni orku.

„Eini mælikvarðinn á stöðu þjóða í raforkuframleiðslu er græn orka,“ sagði Sigurður Ingi. Engin þjóð muni komast undan því að skipta á endanum yfir í græna orku. Það þýði mikil fjárútlát hjá öðrum þjóðum vegna óhjákvæmilegra orkuskipta, fjárútlát sem Íslendingar losni við.

Sigurður Ingi benti þó á að enn væri úrbóta þörf á ýmsum sviðum. Þannig kæmi enn um 20 prósent af orku hérlendis frá óendurnýjanlegum orkugjöfum. Á því þyrfti að taka. Þá hefur notkun heimila á gasi aukist undanfarin ár, úr tæpum 600 tonnum árið 1996 í rúmlega 1.000 tonn árið 2007. Það skýrist af útihiturum og gaseldavélum. „Það er eins og annar hver maður sé orðinn stjörnukokkur sem þurfi gaseldavél.“

Sigurður Ingi segir mikla möguleika í orkutengdri ferðaþjónustu. Hægt væri að búa til útsýnisferðir um virkjanir og ýmis fyrirtæki þeim tengdum. Sérstaða Íslands vekti eftirtekt í útlöndum og út á hana ætti að gera.

kolbeinn@frettabladid.is