Ingvar og Breki hnýttu bestu flugurnar

Ingvar Ingvarsson og Breki Sigurjónsson báru sigur úr bítum í silungafluguhnýtingakeppni sem Krabbameinsfélag Íslands efndi til í samvinnu við Stangaveiðifélag Reykjavíkur, Veiðihornið og Veiðikortið. Keppt var í tveimur flokkum, almennum flokki og unglingaflokki, og voru glæsileg verðlaun í boði fyrir þær flugur sem hrepptu þrjú efstu sætin að því er segir í tilkynningu frá Krabbameinsfélaginu.

„Við erum ánægðir með hvernig til tókst því áhuginn reyndist vera gríðarlegur og fjölmargar „girnilegar" flugur bárust í keppnina. Þess má geta að vinningsflugurnar úr keppninni verða nú settar í framleiðslu og seldar hér í Veiðihorninu til stuðnings Krabbameinsfélagi Íslands," segir Ólafur Vigfússon, veiðimaður og framkvæmdastjóri Veiðihornsins. Haraldur Eiríksson hjá Stangaveiðifélagi Reykjavíkur tekur undir þetta og bætir við að sérstaklega hafi verið ánægjulegt að sjá góða þátttöku í unglingaflokki. „Þetta framtak Krabbameinsfélagsins er vel til fundið og rétt að beina því til stangaveiðimanna að gefa vinningsflugunum góðan gaum."

„Nú er rétti tíminn fyrir veiðimenn til að fara yfir fluguboxin og mjög skynsamlegt væri að kaupa vinningsflugurnar og láta gott af sér leiða um leið," segir Ingimundur Bergsson hjá Veiðikortinu. „Silungsvertíðin er rétt handan við hornið með auknum hita í kortunum, en um leið og hitinn hækkar eykst fæðuframboðið i vötnunum og þá fer fiskurinn af stað."

„Ætli ég hafi ekki byrjað að hnýta í kringum 1974-5 og hef alltaf gaman af," segir Ingvar Ingvarsson sem vann fyrstu verðlaun í almenna flokknum. „Konan mín greindist með brjóstakrabbamein árið 2005 og hefur náð fullum bata, þannig að maður ber hlýjan hug til Krabbameinsfélagsins. Ég fékk náttúrulega hvatningu frá konunni og hún fann líka upp nafnið enda mjög hugmyndarík - Búbbi!"

Sigurvegararnir í unglingaflokknum eru bara tveir því Sigmundur Bragi Gústafsson vann bæði 2. og 3. verðlaun en Breki Sigurjónsson hneppti fyrsta sætið og var að vonum ánægður með sigurinn. „Ég hef haft áhuga á þessu í fimm ár," segir Breki sem er 14 ára gamall. „Ég man ekki alveg hvernig þetta byrjaði, ég fór í eina veiðiferð og fannst það bara gaman." Þetta er í fyrsta sinn sem hann tekur þátt í hnýtingakeppni en hann hyggst prófa vinningsfluguna í sumar. Sigmundur Bragi hlaut bæði 2. og 3. verðlaun en hann er 13 ára gamall og iðinn við hnýtingarnar. „Ég er búinn að vera eitt ár í þessu, ég sá pabba minn gera þetta og vildi fá að prófa," segir Sigmundur og bætir við að flugurnar hafi nýst mjög vel.

„Þetta er í annað sinn sem við höldum þessa keppni og kom þátttakan okkur skemmtilega á óvart því alls bárust yfir 220 flugur," segir Gústaf Gústafsson, markaðs- og fjáröflunarstjóri Krabbameinsfélags Íslands og áhugamaður um veiði. „Stangveiðimenn eru öflugur hópur og viljum við skila þökkum til allra sem tóku þátt í keppninni og óskum sigurvegurunum til hamingju."