Svavar Halldórsson: Auðmenn reyna að hræða blaðamenn

„Tilgangurinn er augljóslega sá að hræða blaðamenn frá því að fjalla um aðdraganda hrunsins. Það er alveg augljóst í mínum huga," segir Svavar Halldórsson, fréttamaður fréttastofu Ríkisútvarpsins en Pálmi Haraldsson hefur stefnt honum vegna fréttar sem hann flutti í kvöldfréttunum í lok mars.

Svavar greindi frá því í fréttinni sem birtist 25. mars síðastliðinn að tveir og hálfur milljarður sem Pálmi fékk lánaða hjá Glitni hafi horfið í reyk.

Þessu hafnar Pálmi alfarið og segist geta gert grein fyrir því hvað varð um féð. Það hafi annarsvegar farið í að greiða skuldir og svo farið í peningamarkaðssjóði.

Fréttakonunni Maríu Sigrúnu Hilmarsdóttur og Páli Magnússyni hefur verið stefnt til vara.

Pálmi krefst þriggja milljóna í miskabætur.

„Fréttin er rétt," segir Svavar sem stendur við umfjöllunina. Aðspurður hvort málsóknin hafi komið honum á óvart segir hann að hótanir um hana hafi borist bæði í orði og eins í símskeyti.

Hann segir auðmennina komna í nauðavörn varðandi stefnur gagnvart fréttamönnum og bætir við: „Menn hafa gert þetta hingað til með allskyns skömmum og hótunum en virðast ganga lengra í þetta sinn."

Þá spyr Svavar að fyrst auðmenn eigi tiltæka peninga til þess að eyða í lögsóknir gegn blaðamönnum afhverju leggi þeir þá ekki féð í fallin fyrirtæki til þess að bæta skaða kröfuhafanna.