Efast um að gömlu lögin geti staðið óbreytt

Fjármálaráðherra efast um að gömlu Icesave lögin geti staðið óbreytt ef nýju lögin verða felld í þjóðaratkvæðagreiðslu. Icesave málið gæti því lent aftur á byrjunarreit hafni þjóðin nýju lögunum.

Forseti Íslands hefur margoft lýst því yfir að ef Icesave lögin verða felld í þjóðaratkvæðagreiðslu taki gömlu lögin aftur gildi en þau voru samþykkt á Alþingi í lok ágústmánaðar.

Í þeim lögum er hins vegar kveðið á um ríkisábyrgð taki ekki gildi nema Bretar og Hollendingar samþykki þá fyrirvara sem Alþingi setti. Mörgum þykir sýnt að þeir hafi í raun hafnað fyrirvörunum.

En standa þá gömlu lögin ef þau nýju verða felld? „Þá eru þau í gildi óbreytt," segir Ragna Árnadóttir, dómsmálaráðherra. „Ég ætla ekki að fara nánar út í það. Þessi þjóðaratkvæðagreiðsla snýst um þessi breytingarlög, segir Ragna aðspurð hvort að Hollendingar og Bretar þurfi ekki samþykkja fyrirvaranna.

Steingrímur J. Sigfússon, fjármálaráðherra, tekur undir þennan skilning að vissu leyti en efast um að gömlu lögin geti staðið óbreytt.

„Það eru vandkvæði á framkvæmd ágústlagana okkar sjálfra vegna jafnvel þó að Bretar og Hollendingar féllust á allt sem að þeim snýr. Einfaldlega vegna þess að það gæti verið vandkvæði fyrir Tryggingarsjóðinn að takast á við skuldbindinguna og það gætu verið vandkvæði fyrir fjármálaráðherra að veita ábyrgðina," segir Steingrímur.

Stjórnarnmenn innlánstryggingasjóðs gætu þannig orðið persónulega ábyrgir fyrir endurgreiðslum vegna Icesave þar sem ríkið ábyrgist bara hluta. Að mati Steingríms þykir sýnt að slíkt gangi ekki upp.

Icesave málið gæti því farið aftur á byrjunarreit ef þjóðin hafnar nýju lögunum.