Ferguson: Rooney getur náð markameti Ronaldo

Sir Alex Ferguson, stjóri Manchester United, var ánægður eftir 3-0 sigur sinna manna gegn Fulham í dag.

Rooney var á skotskónum í dag og skoraði tvö mörk en Ferguson segir að hann geti vel náð markameti Cristiano Ronaldo fyrrum félaga hans hjá United.

„Ég sagði fyrir löngu að það gæti enginn náð að skora 42 mörk á einu tímabili líkt og Ronaldo gerði en Rooney er kominn með 32 mörk núna og þetta er áskorun fyrir hann," sagði Ferguson.

„Hann er líklegur til að skora í næstu átta leikjum liðsins í deildinni og svo eigum við möguleika á að spila fimm leiki í meistaradeildinni. Það gera þrettán leiki og þú veist aldrei hvað gerist. Ég var ánægður þegar að hann var kominn í 30 mörk en við fögnum þessari markaskorun hans," sagði Ferguson sem er yfirsig ánægður með framherjann.