Grétar Rafn að jafna sig eftir hnéaðgerð

Grétar Rafn Steinsson segir á heimasíðu Bolton að honum gangi vel að ná sér eftir að hafa gengist undir aðgerð á hné eftir að tímabilinu lauk í ensku úrvalsdeildinni.

„Ég fór í aðgerðina nokkrum dögum eftir að tímabilinu lauk og ég hef verið að gera styrkingar- og þolæfingar svo ég verði tilbúinn þegar undirbúningstímabilið hefst," sagði Grétar.

„Það var eitthvað að í hnénu og ég þurfti að fara í aðgerð. Ég gat ekki æft jafn mikið og aðrir frá janúar og fram í maí jafnvel þó svo að ég gat spilað," bætti hann við.

„Ég leitaði til læknis sem ég treysti þar sem hann hefur áður hjálpað mér. Ég er ánægður að hann gat gefið sér tíma fyrir mig og endurhæfingin mín er nú þegar á undan áætlun."