Ítrekar fyrri yfirlýsingu - lak ekki upplýsingum um Gunnar

Gunnsteinn Sigurðsson, bæjarstjóri í Kópavogi, segist ekki hafa lekið upplýsingum um Gunnar Birgisson, fyrrverandi bæjarstjóra, til fjölmiðla.

Gunnar sagði á Pressunni í gær að óhróður og rógur hafi einkennt nýafstaðið prófkjör sjálfstæðismanna í Kópavogi og að Gunnsteinn hafi komið upplýsingum frá bæjarskrifstofum Kópavogs til fjölmiðla í aðdraganda prófkjörsins í því augnamiði að leggja stein í götu sína.

Í samtali við fréttastofu í gær vísaði Gunnsteinn ásökunum Gunnars á bug og í tilkynningu sem hann hefur sent frá sér ítrekar hann þá yfirlýsingu.