Da Vinci fléttan: „Svindlarar af hæstu gráðu“

Roger Davidson, píanistinn og milljarðaerfinginn sem Helga Ingvarsdóttir og Vickram Bedi eru sökuð um að hafa féflétt, hefur sent frá sér yfirlýsingu vegna málsins og segist vera fórnarlamb svindlara af hæstu gráðu. Parið er sakað um að hafa haft af Davidson fúlgur fjár, að minnsta kosti sex milljónir dollara, með því að sannfæra hann um að lífi hans væri ógnað af pólskum munkum með tengsl við Opus Dei samtökin.

Vickram Bedi lét hinsvegar hafa eftir sér í gær að Davidson hafi af fúsum og frjálsum vilja látið sig hafa peningana fyrir að koma í veg fyrir að upplýsingar úr tölvu Davidson, sem var sýkt af tölvuveiru, kæmust í hendur yfirvalda. Á tölvunni voru að sögn Vickrams, tónsmíðar píanistans, gríðarlegt magn af klámi, og tölvupóstar frá Davidson til lögfræðinga sinna þar sem lagt var á ráðin um að koma 400 milljónum bandaríkjadala til Bandaríkjanna frá skattaskjólum í Evrópu.

Upplýsingafulltrúi Davidsons sendi frá sér yfirlýsingu til þess að bregðast við þessu í gær: „Þessir þjófar eru ekki venjulegir tölvuviðgerðarmenn eins og sumir miðlar hafa haldið fram," segir meðal annars. „Þau hafa rekið umsvifamikla þjónustu sem sérhæfði sig í tölvuöryggi á Internetinu. Þau öðluðust traust Davidsons með því að vefa flókið net lyga um leið og þau ræktuðu nána vináttu við hann. Hr. Davidson er virtur tónlistarmaður sem lenti í því að veira fór í tölvu hans. Á tölvunni var stór hluti ævistarfs hans á tónlistarsviðinu og lagði hann mikla áherslu á að því yrði bjargað," segir ennfremur. „Því miður, eins og á við mörg okkar, er hann ekki þjálfaður tölvusérfræðingur."

Þá segir að helsta markmið Davidsons sé að aðstoða saksóknarann í Westchester sýslu við vinnslu málsins til þess að glæpamennirnir fái sína refsingu og til þess að hann fái peninga sína til baka. Að hans sögn hefur allur sannleikur málsins enn ekki komið í ljós, en að það muni gerast við málflutninginn. „Þangað til óskar Davidson eftir því að einkalíf hans og fjölskyldu verði virt á þessum erfiðu tímum."