Faðir Helgu: „Ég trúi á sakleysi hennar"

Ingvar J. Karlsson, faðir Helgu Ingvarsdóttur, sem er í haldi í Bandaríkjunum í tengslum við risavaxið fjársvikamál segist trúa á sakleysi dóttur sinnar og að sannleikurinn í málinu muni koma fram.

„Ég hef heyrt frá henni og við erum að vinna í þessu máli," segir Ingvar sem er stjórnarformaður heildsöluverslunarinnar Karl K. Karlsson. Aðspurður hvort málið tengist á einhvern hátt Íslandi segir hann svo ekki vera.

Ingvar segir málið hafa fengið mikið á fjölskylduna. Hann bendir fólki á að trúa ekki öllu sem skrifað er um málið. „Ég trúi á sakleysi hennar," segir hann.

Helga Ingvarsdóttir var handtekin á fimmtudaginn ásamt kærasta sínum Vickram Bedi en þau eru búsett í Chappagua í New York ríki og ráku þar tölvuviðgerðarfyrirtæki. Þau eru sökuð um að hafa svikið hundruð milljóna út úr auðkýfingnum Roger Davidson sem leitaði til parsins með bilaða tölvu árið 2004.

Samkvæmt erlendum fjölmiðlum spann parið upp ótrúlega lygasögu um að vírus hefði verið í tölvunni sem ætti rætur sínar að rekja til Hondúras. Þau blönduðu síðan inn í söguna pólskum prestum með tengsl við Opus Dei samtökin sem rithöfundurinn Dan Brown gerði fræg í bókinni Da Vinci lykilinn. Síðan sviku þau fé af milljónamæringnum sem trúði sögu þeirra eins og nýju neti.

Í grein Wall Street Journal um málið er tekið fram að Helga sé dóttir íslenska athafnamannsins Ingvars J. Karlssonar sem er stjórnarformaður Karl K. Karlsson heildverslunarinnar. Íslenska utanríkisráðuneytið aðstoðar nú fjölskyldu Helgu vegna málsins.

Urður Gunnarsdóttir hjá utanríkisráðuneytinu segir í samtali við DV: „Aðkoma okkar að málum sem þessum er alltaf mjög svipuð. Að aðstoða fólk, koma þeim í samband og sjá til að tryggt sé að Íslendingurinn fái lögfræðiaðstoð. Það er yfirleitt okkar aðkoma."