Forstjóri Flugstoða verður prófessor

Þorgeir Pálsson, forstjóri Flugstoða, tekur við stöðu prófessors í flugleiðsögutækni við tækni- og verkfræðideild Háskólans í Reykjavík, þegar hann lætur af starfi forstjóra Flugstoða í lok apríl. Hann verður jafnframt starfsmaður Flug-Kef ohf., hins nýja sameinaða fyrirtækis, sem tekur við starfsemi Flugstoða og Keflavíkurflugvallar.

Fram kemur í fréttatilkynningu að Þorgeir mun sinna rannsóknarstörfum og vera stjórn hins nýja sameinaða fyrirtækis til ráðgjafar. Gerður hefur verið samstarfssamningur milli Háskólans í Reykjavík og Flugstoða þar að lútandi.

Þorgeir varð flugmálastjóri árið 1992. Hann hafði áður gegnt stöðu prófessors í kerfisverkfræði við Háskóla Íslands og stofnaði kerfisverkfræðistofu Verkfræðistofnunar HÍ, sem meðal annars vann að þróunarverkefnum á sviði flugstjórnar fyrir Flugmálastjórn Íslands.