Flugumferðastjórar aflýstu verkfalli aftur

Félag íslenskra flugumferðastjóra hefur aflýst boðuðum verkföllum flugumferðastjóra á morgun og á föstudaginn. Á fundi hjá ríkissáttasemjara í dag lagði Félag íslenskra flugumferðarstjóra fyrir viðsemjendur sína tillögu að lausn yfirstandandi kjaradeilu.

Flugumferðarstjórar segjast með þessu vilja gefa ríkissáttasemjara og samninganefndum beggja aðila ráðrúm til að fjalla um hugmyndir FÍF til lausnar deilunni, án þess að yfir vofi verkfall. Félagið ætlar ekki að tjá sig opinberlega um tillögur sínar.

Flugumferðarstjórar segjast með þessu staðfesta eindreginn vilja sinn til samninga. Þau hvetji jafnframt ríkisstjórnina og Samtök atvinnulífsins til að tileinka sér þau viðhorf Alþjóðaflutningaverkamannasambandsins, sem fram komu í bréfi til Jóhönnu Sigurðardóttur forsætisráðherra í morgun, að ríkisstjórnin eigi nú að leggja sig fram um að semja við flugumferðarstjóra og hætti að hóta íhlutun í kjaradeiluna með lagasetningu.