Sælgætisverksmiðjunni fargað

Botn virðist fenginn í mál brjóstsykurs­verksmiðjunnar sem hvarf í Hafnarfirði í fyrrasumar. Einungis tveimur dögum eftir að sælgætis­gerðarmaðurinn Jóhannes G. Bjarnason sagði frá hvarfi verksmiðju sinnar í Fréttablaðinu fyrir tæpum þremur vikum hafði ungur maður samband við hann og gat varpað nokkru ljósi á atburðarásina.

Ungi maðurinn, sem ekki vildi láta nafns síns getið, sagðist hafa keypt gáminn sem verksmiðjan var geymd í, ásamt öllu innihaldi hans, af eiganda hússins sem gámurinn stóð við. Hann hafi einungis viljað nota gáminn og því fargað innihaldinu, þriggja milljóna króna brjóstsykursverksmiðjunni, hjá gámaþjónustunni á Akranesi.

Jóhannes segist ekki hafa farið upp á Skaga til að kanna hvort eitthvað finnist af verksmiðjunni, en hann búist frekar við að hún sé orðin að brotajárni og týnd.

Jóhannes hafði áður kært hvarfið til lögreglu sem þjófnað en málið var látið niður falla eftir margra mánaða árangurslausa rannsókn. Nú segist Jóhannes ætla að kæra málið á nýjan leik og vonast til þess að fá skaðann bættan, að minnsta kosti að hluta. - sh