Haldinn ofsóknarbrjálæði

Í nýrri bók eftir fyrrverandi blaðamann kvikmyndabiblíunnar Variety um framleiðslufyrirtæki Stevens Spielberg, DreamWork, er því haldið fram að leikstjórinn sé haldinn hálfgerðu ofsóknarbrjálæði. Óttast hann mjög að upplýsingar um nýjar myndir sínar rati til keppinauta sinna.

Enginn fær að sjá þegar Spielberg skoðar efni úr myndum sem hann er með í undirbúningi og öll skjöl sem eru send út af skrifstofu hans eru dulkóðuð. Einnig er þannig um hnúta búið á skrifstofu hans að ómögulegt er að heyra símtöl leikstjórans því sérhannaður skjöldur úr plexigleri gnæfir yfir skrifborðinu. „Þegar Spielberg er ekki á skrifstofunni eru myndavélar sem taka upp allt sem gerist þar og hann getur séð það heima hjá sér,“ segir í bókinni. Sömuleiðis kemur þar fram að leikstjórinn er vel búinn undir náttúruhamfarir. Lætur hann allt starfsfólk sitt fá neyðarbúnað sem það getur notað ef jarðskjálfti eða álíka hamfarir ganga yfir tökustaðinn.

Fulltrúi Spielbergs vísar þessu öllu saman á bug:„Þessar lýsingar eru svo fjarri raunveruleikanum að ég ætla ekki að tjá mig frekar um þær,“ sagði hann.