Reynt að funda um nýjan samning í dag

Bretar og Hollendingar fóru í gær yfir tilboð Íslendinga um nýja lausn á Icesave. Tveir fundir voru með íslensku sendinefndinni sem er ytra. Hún er þar enn og er reiknað með frekari samtölum í dag. Óvíst er hvort um formlega fundi verður að ræða. Ákvörðun um heimför nefndarinnar bíður viðbragðanna.

Guðmundur Árnason, ráðuneytisstjóri í fjármálaráðuneytinu, sem situr í samninganefndinni, segir að fundir gærdagsins hafi verið góðir.

„Það voru tveir ágætir fundir í dag [gær] og menn hafa verið í sambandi og skipst á hugmyndum." Hann eigi allt eins von á að nefndin komi heim í dag, en ekki megi lesa of mikið í það, hún hafi verið á heimleið undanfarna daga.

Næstu skref eru Breta og Hollendinga. Þeir fengu í gær frekari útreikninga á hvað hugmyndir Íslendinga þýða.

Áfangi náðist þegar formlegir fundir voru haldnir í gær, en fram að því hafði nefndin aðeins verið í óformlegu sambandi við viðsemjendur sína í þessari útiveru. Fulltrúar Hollendinga komu til London til að sitja fundina. Þeir ráðslaga nú við Breta um næstu skref.

Samkvæmt heimildum Fréttablaðsins mun ríkisstjórnin leggja fram frumvarp um að lögin, sem kjósa á um í þjóðaratkvæðagreiðslu á sunnudag, verði dregin til baka, náist samkomulag í London. Þar á bæ sé litið á atkvæðagreiðsluna sem óþarfa náist nýir samningar.

Ekki sé þörf á kosningum um ríkisábyrgð á samningum sem verði í raun fallnir úr gildi.

Gangi það eftir þurfa stjórnarflokkarnir að ná samkomulagi við stjórnarandstöðuna um að hætta við þjóðaratkvæðagreiðsluna.

Eins og Fréttablaðið hefur greint frá snýst tilboð Íslendinga um greiðslu á höfuðstól og fjármögnunarkostnaði. Sætti viðsemjendur sig við það, sé um umfangsmikla lækkun að ræða frá fyrri samningum.

- kóp