Meiri líkur á greiðslufalli

Þorvaldur Gylfason, prófessor í hagfræði, segir að horfurnar í efnahagsmálum þjóðarinnar séu mun dekkri en fyrir einu og hálfu ári þegar Alþjóðagjaldeyrissjóðurinn kom hingað fyrst. Hann segir að líkur á greiðslufalli ríkissjóðs séu mun meiri núna en þá.

Þorvaldur var gestur Sigurjóns Egilssonar í útvarpsþættinum Sprengisandi á Bylgjunni fyrr í dag. Hann sagði í þættinum að horfurnar í þjóðarbúskapnum væru miklu mun dekkri núna heldur en fyrir einu og hálfu ári síðan þegar Alþjóðagjaldeyrissjóðurinn kom hingað fyrst eftir bankahrunið.

Það væri annars vegar vegna þess að Seðlabankinn hefði metið erlendar skuldir þjóðarbúsins miklu mun minni en þær væru í reynd. Þá sagði hann líkurnar á greiðslufalli raunverulegar í dag, en hann sjálfur hefði talið slíkt óhugsandi fyrir einu og hálfu ári.)

„Horfurnar eru mun dekkri en þær voru þegar Alþjóðagjaldeyrissjóðsins kom hingað fyrst. Til þess liggja nokkrar ástæður. Ein er sú að Seðlabanki Íslands vanmat erlendir skuldir þjóðarbússins sem reyndust vera næstum því tvisvar sinnum meiri miðað við landsframleiðslu en talið var í upphafi," sagði Þorvaldur, en hann var einn umsækjenda um stöðu seðlabankastjóra.

Hann sagði að önnur ástæða væri sú að stjórnvöld hefðu vanrækt að taka stöðu með almenningi og tala skýrt um að þeir sem ábyrgð bæru á hruninu þyrftu að sæta ábyrgð. Af þeirri ástæðu myndi þjóðin fella Icesave í þjóðaratkvæðagreiðslu, en tafir lausn Icesave hefðu haft mjög slæmar afleiðingar.

„Og þess vegna er það svo að segja gefið fyrir fram að Icesave samkomulagið verði fellt í þjóðaratkvæðagreiðslunni," sagði hagfræðiprófessorinn.

Þorvaldur sagði að uppgjör við hrunnið hefði gengið of hægt meðal annars vegna þess að stjórnvöld hefðu haldið rangt á spilunum. „Rústabjörgunin hefur gengið alltof hægt og illa því að tíminn og kraftarnir hafa farið í tóma vitleysu."