Öll Eurovision-lögin tilbúin og spennan magnast

Lögin 39 í Eurovision eru nú komin fram og Eurovision-vertíðin fyrst byrjuð fyrir alvöru. Óhætt er að segja að fátt komi verulega á óvart í þessari fimmtugustu og fimmtu Eurovisionkeppni.

Stuðið hefst þriðjudaginn 25. maí. Þá keppa 17 lög um tíu laus sæti í aðalkeppninni. Íslenska lagið er síðast á dagskrá, sautjánda lag kvöldsins. Það þykir ágætis staður til að vera á. Moldóvar ríða hins vegar á vaðið þetta kvöld með hressilegu europoppi á ensku í flutningi SunStroke Project og söngkonunni Olia Tira. Keppninautar Heru

Það er mikill hrærigrautur í gangi þetta kvöld, en öll frumefni Eurovision síðustu ára eru samt á sínum stað, hvort sem það eru léttklæddar ljóskur eða þjóðlegi fílingurinn. Stundum fer þetta saman eins og hjá frændum okkar Finnum sem senda tvær söngkonur úr kvennagrúppunni Värttinä. Önnur spilar líka á harmóníku og lagið er ekta finnskur tangó sunginn á finnsku.

Þótt enskan sé enn þá vinsæl hafa nokkrar þjóðir tekið þá áhættu að syngja á móðurmálinu. Á okkar undankvöldi syngur til að mynda slóvakíska söngkonan Kristina á slóvakísku, rétt eins og Serbinn Milan Stankovic, Grikkinn Giorgos Alkaios, Portúgalinn Filipa Azevedo og Gjoko Taneski frá Makedóníu. Á meðan við bíðum eftir Heru á svið fáum við að heyra vestrænt tölvuknúið popp og dramatískar ballöður – allt samkvæmt bókinni. Lagið „Siren“ með Malc­olm Lincoln & Manpower 4 frá Eistlandi er líklega óvenjulegasta lag kvöldsins. Þar er ófrumleika skipt út fyrir einlægan drengjasöng í ágætis lagi. Hrærigrauturinn heldur áfram

Oftast er lítill spenningur fyrir „hinu“ undankvöldinu, því sem Ísland er ekki með á, enda harðkjarna Eurovision-fíklar ekki svo fjölmennur hópur. Á því kvöldi heldur hrærigrauturinn áfram að bulla á pönnunni í Ósló. Þeir sem leggja það á sig munu heyra 17 lög, sungin á hebresku, frönsku, hollensku, slóvakísku, búlgörsku, króatísku og ensku. Þarna eru ýmsar þjóðir sem við höfum hrúgað á stigum í gegnum tíðina. Danska lagið er mjög „danskt“ og flutt af Chanée and N’evergreen, ungu og fallegu fólki. Lagið minnir nokkuð á „Every breath you take“ með Police. Svíar senda Önnu Bergendahl, sem syngur fremur tilþrifalitla ballöðu. Frændur okkar Írar senda íralega ballöðu með söngkonunni Niamh Kavanagh. Niamh, sem er fædd árið 1968, hefur reynslu af Eurovision því hún sigraði í keppninni árið 1993 með laginu „In your eyes“, sem ekki nokkur maður man eftir. Franskt rapp

Tíu lög fara áfram af þessu kvöldi og það verða því 25 lög samtals á aðalkvöldinu laugardaginn 29. maí. Fimm lög þurfa ekki að fara í gegnum nálarauga undankeppnanna, „stóru löndin fjögur“ og gestgjafarnir Norðmenn, sem senda ungan hjartaknúsara, Didrik Solli-Tangen, og angurværa sykurballöðu.

Spánverjar senda Daniel Diges, mann með afró, aðstoðarballerínu og ballöðu á spænsku í farteskinu. Bretar bjuggu til „idol-keppni“ í kringum sitt val og í henni vann hinn vongóði Josh, sem syngur þunnt stuðlag eftir Waterman og Stock, sem voru heitir fyrir rúmlega tuttugu árum. Blakki rapparinn Jessy Matador tekur hresst stuðlag fyrir Frakka, „Allez! Ola! Olé!“ og rappar að sjálfsögðu á frönsku. Þjóðverjum er ekki eins annt um þjóðtunguna og Frökkum og senda Lenu Meyer-Landrut að syngja lagið „Satellite“ á ensku. Það er ljóst að Emilíana Torrini hefur haft mikil áhrif á þýska poppið því laginu svipar nokkuð til poppuðustu laga hennar.

drgunni@frettabladid.is