Steingrímur sagði aldrei að Icesave væri of flókið fyrir þjóðaratkvæði

Steingrímur J. Sigfússon fjármálaráðherra, sem var í viðtali við Svenska dagladet um helgina, sagði aldrei í samtalinu við blaðamanninn að málið væri of flókið til þess að hægt væri að kjósa um það í þjóðaratkvæðagreiðslu. Innlendir sem erlendir miðlar fjölluðu um málið í gær og þar var vitnað til inngangs blaðamannsins sænska sem var að túlka orð Steingríms.

Elías Jón Guðjónsson fjölmiðlafulltrúi fjármálaráðherra bendir á að þegar orð Steingríms séu lesin orðrétt komi í ljós að hann sagði málið aldrei of flókið, aðeins að það væri óvenjulegt að svo flókið mál færi í þjóðaratkvæðagreiðslu.

„Það er óvenjulegt að svo flókin mál sem fjalla um deilur við önnur lönd og fjárhagslegar ákvarðanir líkt og ríkisábyrgðir og skatta séu lögð í þjóðaratkvæðagreiðslu. Jafnvel í löndum þar sem rík hefð er fyrir þjóðaratkvæðagreiðslum er ekki kosið um skatta til dæmis," sagði ráðherrann orðrétt.