Samstarfi Jóhönnu Guðrúnar og Maríu að ljúka

Tíu ára samstarfi söngkonunnar Jóhönnu Guðrúnar Jónsdóttur og umboðsmannsins Maríu Bjarkar Sverrisdóttur lýkur í sumar. Norskur umboðsmaður tekur þá við keflinu en söngkonan hyggst fylgja eftir frábærri frammistöðu í Eurovision-keppninni fyrir ári. María Björk staðfesti þetta í samtali við Fréttablaðið í gær.

„Samningurinn milli mín og Jóhönnu rennur út í sumar og þá er þetta búið. Norski umboðsmaðurinn mun smátt og smátt taka við henni,“ segir María Björk og tekur fram að þetta hafi allt gerst í mesta bróðerni, engum hurðum hafi verið skellt. „Ég er með næg járn í eldinum sem er ekki tímabært að segja frá og hef nóg á minni könnu.“

María, sem hefur um árabil rekið Söngskóla Maríu Bjarkar, segir þessi tíu ár hafa verið mikla rússíbanareið en hún uppgötvaði sönghæfileika Jóhönnu þegar söngkonan var aðeins níu ára gömul.

„Maður byrjaði náttúrlega með barn sem síðan varð unglingur og nú er bara komið að leiðarlokum hjá okkur og við taka ný verkefni og nýir tímar,“ segir María. Hún viðurkennir að ævintýrið í Moskvu hafi verið ákveðinn hápunktur þar sem Jóhanna söng sig inn í hug og hjörtu Evrópubúa með Is it True? og hafnaði í öðru sæti.

Jóhanna Guðrún segir að samstarfið hafi verið gott á meðan það var og María hafi staðið sig ákaflega vel. „Enda sjaldgæft að svona samstarf skuli vara svona lengi,“ segir Jóhanna. Nú hafi aftur á móti verið rétti tímapunkturinn að breyta til hjá þeim báðum og halda áfram, hvor á sinni braut. Jóhanna segir norska umboðsmanninn, Eyvind Brydoy, vera feikilega virtan í sínu fagi, hann sé með á sínum snærum hljómsveitir sem hafi verið að gera góða hluti í Evrópu.

„Auðvitað horfir maður til útlanda þótt auðvitað geti brugðið til beggja vona í þeim bransa. En þá skiptir máli að vera með góð sambönd og tengslanetið í lagi þótt ég sé ekki að segja að María hafi ekki verið með það,“ segir Jóhanna sem hefur þegar verið bókuð til að koma fram á listahátíð í Finnlandi.

freyrgigja@frettabladid.is