Forsætisráðherra fundaði með þýskum þingmönnum um Evrópumál

Jóhanna Sigurðardóttir forsætisráðherra fundaði í dag með sendinefnd frá Evrópunefnd þýska þingsins. Forsætisráðuneytið segir að nefndin muni fjalla um umsókn Íslands um aðild að Evrópusambandinu, áður en kanslari Þýskalands tekur afstöðu til umsóknarinnar á fundi leiðtoga Evrópusambandsins.

Á fundinum í dag var rætt um stöðu mála varðandi aðildarumsóknina og afgreiðslu hennar, stöðu Íslands í efnahagsmálum og samstarf við Alþjóðagjaldeyrissjóðinn um uppbyggingu efnahagslífsins. Forsætisráðherra áréttaði að staða mála varðandi Icesave-samningaviðræður ætti ekki að hafa áhrif á öðrum vettvangi og væri tvíhliða málefni sem yrði leyst í því samhengi. Ísland hefði mikið fram að færa, meðal annars á sviði jafnréttismála, umhverfismála og ekki síður með menningu sinni og sögu.