Sömdu fyrir leikrit

Skagahljómsveitin Cosmic Call, sem gaf út sína fyrstu EP-plötu í fyrra, semur stóran hluta tónlistarinnar í leikverkinu Karíókí sem var frumsýnt í Fjölbrautaskóla Vesturlands á Akranesi á dögunum.

Allir meðlimir hljómsveitarinnar eru eða hafa verið nemendur í skólanum og fannst leikstjórum verksins, þeim Gunnari Sturlu Hervarssyni og Einari Viðarssyni, tilvalið að fá þau til liðs við leikhópinn. „Okkur fannst það mjög skemmtilegt og krefjandi verkefni,“ segir söngvarinn Sigurmon Sigurðsson.

„Við vorum ekki alveg viss í byrjun hvernig þetta gengi fyrir sig þar sem við höfðum aldrei gert neitt þessu líkt áður. Þetta er búið að vera mjög skemmtilegt ferli. Það er alltaf gott fyrir hljómsveitir og bara alla tónlistarmenn að takast á við fjölbreytileg verkefni,“ segir hann. - fb