Capello tekur ákvörðun um John Terry

Enska knattspyrnusambandið hefur gefið það út að það sé í höndum landsliðsþjálfarans, Fabio Capello, hvað verði um John Terry.

Afar skiptar skoðanir eru á því á Englandi hvað skuli gera við Terry í kjölfar þess að upp komst framhjáhald hans. Terry hélt fram hjá eiginkonu sinni með unnustu og barnsmóður Wayne Bridge. Bridge var þá enn í sambandi við konuna sem heitir Vanessa Perroncel.

Margir vilja að Terry missi að lágmarki fyrirliðabandið hjá landsliðinu á meðan sumir vilja ekki sjá hann í enska landsliðsbúningnum aftur.

Capello kemur til Englands síðar í vikunni og þá mun hann tækla málið.