Óánægja með endurkomu hverfisskóla

Nýjar innritunarreglur í framhaldsskóla búa til fleiri vandamál en þær leysa, segir Ingi Ólafsson, skólastjóri í Verslunarskóla Íslands, sem í fyrsta sinn í sögu skólans verður að hverfisskóla. Skiptar skoðanir eru hjá skólastjórum framhaldsskóla um reglurnar sem fela í sér að að minnsta kosti 45 prósent nýnema eigi að koma úr skólum í grenndinni.

Ingi segir grunnskólanema setta í átthagafjötra með reglunum. Már Vilhjálmsson, skólastjóri Menntaskólans við Sund, segir reglurnar í mótsögn við lög um framhaldsskóla. Þau hvetji til sérstöðu skóla en reglur um hverfisskóla dragi úr valmöguleika nemenda til að velja sér skóla við hæfi. Ingibjörg S, Guðmundsdóttir, skólastjóri Kvennaskólans, tekur undir þessi sjónarmið, reglurnar muni heldur ekki leysa öll vandamál er snúa að innritun nýnema í framhaldsskóla, heldur færa vandann til.

Lársus H. Bjarnason, skólastjóri Menntaskólans við Hamrahlíð, segir lítið hægt að segja um innritunarreglurnar fyrr en á þær hafi reynt. Hann hafi þó á tilfinningunni að þær breyti ekki miklu fyrir skólann, MH hafi ætíð tekið hærra hlutfall úr nágrenninu en ýmsir aðrir skólar, búseta hafi verið sjónarmið sem tekið hafi verið tillit til.

Guðrún Hrefna Guðmundsdóttir, skólastjóri Fjölbrautaskólans í Breiðholti, býst ekki við að reglurnar breyti miklu fyrir FB.

Framhaldsskólum ber að setja inngönguskilyrði fyrir nýnema í samráði við menntamálaráðuneytið. Þær upplýsingar fengust þar að framhaldsskólar eigi að hafa þær tilbúnar um næstu mánaðamót.

Innritun í framhaldsskóla gekk brösuglega síðastliðið vor eins og greint var frá í fréttum. Ingibjörg segir vandræðin ekki hafa skapast út af því að samræmdu prófin voru aflögð heldur vegna þess hve mikill nemendafjöldi sótti um framhaldsskólavist, mjög lítill sveigjanleiki sé í kerfinu vegna þess að plássin fyrir nemendur séu ekki nægilega mörg.

Már er sama sinnis og segir vandamál vera að trassað hafi verið í mörg ár að byggja nýjan framhaldsskóla í Reykjavík. Það hafi haft þær afleiðingar að skólabekkirnir séu afar þétt setnir og val nemenda af skornum skammti. Þeir hafi í raun ekki val um framhaldsskóla fyrr en námsframboð verði aukið, framboð af skólaplássum verði meira en eftirspurn.

Þess má geta að nemendum ber að sækja um framhaldsskóla í byrjun apríl og kemur þá í ljós hvert straumurinn liggur. Engar einkunnir fylgja þeirri umsókn en þær eru svo sendar á framhaldsskólana að grunnskólaprófum loknum. Nemendur geta sótt um hvaða skóla sem er, en hafa forgang í hverfisskólum.

sigridur@frettabladid.is